Նորություններ : 2005 - 2006 : Ծրագիրը հաստատուն քայլերով գնում է առաջ

Ծրագրի մասնակից Գյումրի, Վանաձոր եւ Երեւան քաղաքներում իրենց ընթացիկ աշխատանքներն են շարունակում բանավեճի ակումբները: Եվ թեպետ արդեն հետեւում են մնացել ներդպրոցական բանավեճերն ու քաղաքացիական նախաձեռնությունների շրջանակներում կազմակերպված կլոր սեղան-քննարկումները, բանավեճի ակումբները շարունակում են աշխատել` մեծ ոգեւորությամբ պատրաստվելով Բանավեճի ակումբների ցուցահանդեսին ու Միջդպրոցական մրցաշարին (թեմաները եւ հղումները տե'ս  "Բանավեճեր  բաժնում" ): 

"Մարդու իրավունքներ" թեմայով մարտի 27-30-ը կազմակերպված կլոր սեղանները երեք քաղաքներում էլ ընթացան ակտիվ հարց ու պատասխանի ու քննարկումների մթնոլորտում: Թեպետ առաջադրված հարցերը շատ էին ու բազմաբնույթ, հրավիրված փորձագետները մեծ համբերատարությամբ ու սիրով էին պատասխանում մասնակիցների հարցերին, որոնք մերթընդմերթ շեղվում էին թեմայից` վերաբերելով աշակերտ-ուսուցիչ հարաբերություններին, դպրոցում առկա ուսպլանին ու գնահատման համակարգին:

Այնուամենայնիվ, կազմակերպված կլոր սեղանները մի անգամ եւս ցույց տվեցին, որ բանավեճի ակումբների անդամներին` որպես երկրի ապագան կերտողների, իրոք մտահոգում են Հայաստանում մարդու իրավունքների հետ կապված խնդիրների լուծումներն ու պետության ժողովրդավարացման գործընթացը:

Ծրագրի հաջորդ քայլը ապրիլի 12-14-ը կազմակերպվող բանավեճի ակումբների ցուցահանդեսն է, որին էլ կհաջորդի բանավեճի ակումբների միջդպրոցական մրցաշարը: